British Council və Britaniya Səfirliyi Azərbaycanda Birləşmiş Krallıqda təhsil almış məzunların nailiyyətlərini qeyd edir.
British Council və Britaniya Səfirliyi Azərbaycanda "Study UK" Məzun Mükafatları 2021-22 müsabiqəsinin 12 finalçısını böyük qürurla elan edir. 12 finalçı iş adamı, sahibkar və ictimai xadim kimi əldə etdikləri böyük nailiyyətlərin, eləcə də Birləşmiş Krallıqla Azərbaycan arasında mövcud olan əməkdaşlıq əlaqələrinin gücləndirilməsinə verdikləri mühüm töhfələrin nəzərə alınması ilə dünyanın hər yerindən müraciət etmiş 1,200-dən artıq müraciətçi arasından seçilib. Mükafatın beş qalibi Hilton Bakı otelinin Sevda zalında 28 yanvar tarixində, saat 19:00-da baş tutacaq mərasimdə elan ediləcək. British Council mükafatlandırma mərasimini rəsmi Facebook səhifəmizdə canlı yayımlayacaq.
Bu nüfuzlu beynəlxalq mükafat Birləşmiş Krallığın ali təhsil sistemini və Birləşmiş Krallıqda təhsil almış məzunların bütün dünyada əldə etdikləri nailiyyətləri qeyd edir. Artıq səkkiz ildir keçirilən bu müsabiqəyə 100-dən çox ölkədən olan və Birləşmiş Krallıqda təhsil almış məzunlar Birləşmiş Krallığın müxtəlif yerlərində olan 140-dən artıq ali təhsil müəssisəsini təmsil edərək qatılıb. KİV nümayəndələrini Hilton Bakı otelinin Sevda zalında 28 yanvar tarixində keçiriləcək bu tədbirə saat 18:30-da iştirak etməyə dəvət edirik. Azərbaycanda "Study UK" Məzun Mükafatları British Council-ın Azərbaycandakı nümayəndəliyi və Britaniyanın Azərbaycandakı səfirliyi tərəfindən keçirilir.
Elm və dayanıqlı inkişaf dünyasında qurduqları karyera və əldə etdikləri nailiyyətlərlə seçilən məzunlara verilən "Elm və Davamlılıq" mükafatının finalçıları:
- Nərmin Babayeva - Lids Universitetinin məzunu,
- Rauf Cabbarov - Mançester Universitetinin məzunu,
- İnqilab Şahbazov - Şeffild Universitetinin məzunu.
İncəsənət və mədəniyyət sahəsində karyera qurmuş, sənətkar orijinallığı, təsiri və yaradıcılığını nümayiş etdirmiş məzunlara verilən "Mədəniyyət və Yaradıcılıq" mükafatının finalçıları:
- Lalə Əliyeva - London Universitetinin Qoldsmits Kollecinin məzunu,
- Asiyə Həsənova - London, İncəsənət Universitetinin məzunu,
- Əsli Səmədova - London İqtisadiyyat və Siyasi Elmlər Məktəbinin məzunu.
Müsbət sosial dəyişiklik etmək və başqa insanların həyatını yaxşılaşdırmaq istiqamətində müstəsna səy göstərən və töhfə verən məzunlara verilən "Sosial Fəaliyyət" mükafatının finalçıları:
- Türkan Əliyeva - Lester Universitetinin məzunu,
- Müjdət Həsənov - Bristol Universitetinin məzunu,
- Həmidə Zeynalova - Birminqhem Siti Universitetinin məzunu.
İnkişaf potensialına malik innovativ və ya yaradıcı yeni ideya, həll və ya biznes imkanlarını irəli sürmək və ya onları dəstəkləmək baxımından fəal olan məzunlara verilən "Biznes və İnnovasiya" mükafatının finalçıları:
- Musa Əfəndiyev - London İqtisadiyyat və Siyasi Elmlər Məktəbinin məzunu,
- Rövşən Əlizadə - Kardiff Universitetinin məzunu,
- Rəşad Mirzəyev - London Şəhər Universiteti - CASS Biznes Məktəbinin məzunu.
Bu ilin ilhamverici finalçıları haqqında daha ətraflı məlumat əldə etmək üçün nəzər salın:
https://www.britishcouncil.az/study-uk/alumni-awards
Azərbaycanda hər bir mükafat kateqoriyasının qalibi seçdikləri peşəkar inkişaf imkanına sərf etmək üçün 3,000 GBP (~6,930 AZN) məbləğində mükafat əldə edəcək.
Birləşmiş Krallığının Azərbaycan Respublikasındakı səfiri, cənab Ceyms Şarp:
“Artıq üçüncü ildir ki, “Study UK” Məzun Mükafatları üçün finalçıları seçmək imkanını əldə edirəm və namizədlərin keyfiyyəti və öz sahələrinə fədakarlığı məni heyran etməyə davam edir. Birləşmiş Krallıqda bilik və bacarıqlarını inkişaf etdirən və öyrəndiklərini öz sahələrində tətbiq etmək üçün Azərbaycana qayıdan bütün bu gəncləri görmək çox gözəldir. Onların hamısına gələcəkdə böyük uğurlar arzulayıram.”British Council-ın Azərbaycandakı direktoru, cənab Frensis Qardener-Trexo:
“Təhsil mübadiləsi Birləşmiş Krallığın Azərbaycanla strateji əlaqələrinin mühüm tərkib hissəsidir. Azərbaycanın Birləşmiş Krallıq məzunlarından ibarət şəbəkəsinin miqyası genişdir və onların bir çox sektorlar üzrə töhfələri ölkənin gələcəyinin formalaşmasında mühüm rol oynamışdır. Study UK Məzun Mükafatları həqiqətən görkəmli şəxsləri qeyd etmək və onların nailiyyətlərinin əldə edilməsində Birləşmiş Krallıq təhsilinin rolunu etiraf etmək üçün bir fürsətdir”.